२०७९ माघ १३, शुक्रबार

जानी राखौँ, गर्मीमा कस्तो मेकअप गर्दा उचित हुन्छ ?

बैशाख ०२, २०७६  | १०९० पटक पढिएको

सुहाउँदो मेकअपले सुन्दरतामा थप निखार ल्याउँछ । समयअनुसारको मेकअप गर्न सकेमा सुन्दरसँगै स्वस्थसमेत रहन सकिन्छ । हाल गर्मी मौसम सुरु भइसकेको छ । मौसमअनुसार छालाको प्रकृति पनि बदलिने भएकाले सुन्दरतामा ध्यान पुर्याउनुपर्ने हुन्छ । जुनै किसिमको छाला भए पनि गर्मीयाममा मेकअप गर्न अफ्ठ्यारो हुन्छ । यो वेला धुवाँ–धुलो बढी हुने, पसिना धेरै आउने कारण छाला धेरै सुख्खा र तैलीय हुने हुन्छ । यसले मेकअपलाई प्रभावित पारिरहेको हुन्छ । त्यसैले, छाला र सुन्दरतामा असर नपर्नेगरी यसरी मेकअप गर्न सकिन्छ :

– गर्मीमा तैलीय छाला हुने हुँदा फाउन्डेसन लगाउँदा बग्ने र धब्बा देखिने हुन्छ । यसका लागि मेकअप गर्दा निकै ध्यान पु(याउनुपर्ने हुन्छ । पसिना र तैलीय छालाका कारण कहाँ कालो वा धब्बा देखिन्छ, मेकअप गर्नुभन्दा अघि त्यहाँ पूर्वतयारीका उपाय अपनाउनुपर्छ ।

– सुरुमा अनुहार सफा गर्नुपर्छ । यसमा फेसवास र नरम क्लिन्जिङ आदि प्रयोग गर्न सकिन्छ । मेकअपअघि अनुहार राम्ररी पखाल्न जरुरी हुन्छ ।

– गर्मीमा घामका किरण सीधै छालामा पर्छन् । यसले असर देखिन सक्छ । त्यसैले, मेकअपअघि मोस्चराइजर लगाउनुपर्छ । छालाको प्रकृतिअनुसार मेटिफाइङ प्राइमर अर्थात् आयल फ्री मोस्चराइजरको प्रयोग गर्नुपर्छ । यसो गर्दा छालाको तैलिय तत्व सुक्छ र मेकअप राम्रो देखिन्छ ।

– छालामा मोस्चराइजरको प्रयोग गरेपछि केही समय खुला छोडिदिनुपर्छ । यसले छाला नरम बनाउन मद्दत गर्छ । त्यस्तै, घाममा हिँड्दा सनस्क्रिम पनि लगाउन सकिन्छ ।

– मोस्चराइजरपछि प्राइमर लगाउनुपर्छ । यसले छालालाई सुरक्षित बनाउनुका साथै मेकअपलाई समेत सुरक्षा दिन्छ । त्यसैले, गर्मीमा पनि मेकअप लामो समय कायम रहन्छ । प्राइमरको प्रयोग गर्दा हलुका हुने भएकाले प्राइमर लगाएको महसुससम्म हुँदैन ।

– गर्मीमा लिक्विड फाउन्डेसन उपयुक्त हुँदैन । तैलीय छालामा यो थोरै समय मात्रै टिक्ने भएकाले फाउन्डेसनको कवचको रूपमा क्रिम प्रयोग गर्न सकिन्छ । यसमा लुज पाउडर पनि लगाउन सकिन्छ । जसले गर्दा, फाउन्डेसन लामो समयसम्म टिक्ने र चिटिक्क देखिने हुन्छ । यद्यपि, काममा हिँड्ने हो भने फाउन्डेसनको प्रयोग नगरी हलुका मेकअप गर्दा राम्रो हुन्छ ।

– गर्मी मौसममा गाजल, आइस्याडो, मस्कारा र लिपिस्टिक आदि वाटरपु्रफ र म्याट मात्र प्रयोग गर्नुपर्छ । यसो गर्दा, बाहिर हिँड्दा पसिना वा पानीका कारण बग्ने वा लतपतिने सम्भावना हुँदैन । यो वेला सकेसम्म हलुका मेकअप गर्न आवश्यक हुन्छ । रङको छनोट गर्दा पनि सकेसम्म फिका रङ छान्नु उपयुक्त हुन्छ ।

– आँखामा आइलाइनरको प्रयोग गर्न सकिन्छ । त्यस्तै, हुलका गुलाबी र सुन्तला रङको चमकरहित आइस्याडो लगाउँदा राम्रो देखिन्छ । विशेषगरी, साँझ र रातको पार्टीमा चमक भएको आइस्याडो लगाउन सकिन्छ । तर, दिउसो रंगीन मेकअप अनावश्यक देखिन सक्छ ।

– साथै, दिउँसो बाहिर हिँड्दा सकेसम्म गाढा मेकअप नगर्नु नै बेस हुन्छ । यो छालाको स्वास्थ्यका दृष्टिकोणले समेत नराम्रो हो । s. nayapatrika

साक्षी खबर अनलाइनमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ ।
यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, युट्युबमा पनि जोडिन सक्नुहुन्छ ।

प्रतिक्रिया दिनुहोस