कोभिड खोपका लागि विश्व बैंकले नेपाललाई साढे ७ करोड डलर दिने

चैत्र ०६, २०७७  | १४७ पटक पढिएको

०६ चैत्र, काठमाडौं ।

विश्व बैंकले नेपाललाई कोभिड–१९ विरुद्धको खोपका लागि ७ करोड ५० लाख डलर सहायता प्रदान गर्ने भएको छ।

विश्व बैंकको कार्यकारी सञ्चालक समितिले सो प्रस्ताव बिहीबार पारित गरेको हो।

सुरक्षित र प्रभावकारी कोभिड–१९ विरुद्धको खोपमा नेपाली नागरिकको समान र सहज पहुँच सुनिश्चित गर्न इन्टरनेसनल डेभलपमेन्ट एसोसियसन (आईडीए) मार्फत् सो सहायता प्रदान गर्न लागिएको विश्व बैंकले जनाएको छ।

‘यो आर्थिक सहायताबाट समान वितरण प्रणालीमार्फत नेपालको कम्तीमा एकतिहाइ जनसंख्यालाई खोप लगाउन सहजीकरण हुने अपेक्षा गरिएको छ’, विश्व बैंकले वाशिङटनबाट जारी गरेको विज्ञप्तिमा भनिएको छ।

विश्व बैंक यसअघि पनि गत अप्रिल महिनामा कोभिड–१९ आपत्कालीन पहल तथा स्वास्थ्य प्रणाली तयारी परियोजनाअन्तर्गत २ करोढ ९० लाख डलर सहायता गरेको थियो।

बिहीबार नै बैंकले बंगलादेशका लागि ५० करोड डलर, अफगानिस्तानका लागि ६ करोड डलर प्रदान गर्ने लगायतका प्रस्तावहरु पनि पारित गरेको छ।

प्रतिक्रिया दिनुहोस